Krossviður

Undanfarið hef ég verið alveg veik fyrir krossvið í innréttingar og húsgögn. Ég fef verið að skipuleggja breytingar á heimilinu og langar mikið til að nota þennan efnivið og þá er þetta svipað og þegar maður kaupir sér nýjan bíl, maður sér bara þá tegund á götunum. Eftir að ég fékk þessa hugmynd sé ég alls staðar krossvið notaðan inná heimili. Enda svo sem ekkert skrýtið, hann er ódýr, hægt að nota í allt og merkilega hlýlegur þrátt fyrir að vera mjög hrár efniviður. Ég er alveg heilluð af þessum myndum hér fyrir neðan!

Heima hjá mér

Það er alveg orðið óásættanlegt hvað ég hef lítið sinnt þessu bloggi undanfarið. En það hefur svo sem verið nóg að gera í öðrum verkefnum og ég skýli mér bak við það.

Mér sjálfri finnst alltaf svo gaman að sjá inná heimili annarra svo ég ákvað að týna til nokkrar myndir sem ég hef póstað á Instagram frá heimilinu mínu.

 

Ef ykkur langar megið þið endilega fylgja mér á Instagram, ég er undir gudrunva. :)

Góða helgi!

Svart hvítt

Þótt ég elski alla liti og langar rosalega að eiga glaðlegt og litríkt heimli þá finn ég mig oft laðast ofboðslega að svörtum og hvítum hlutum…og þá sérstaklega fötum.  Enda ekkert að því að blanda saman! Hérna eru 10 svartir og hvítir hlutir sem eru á óskalistanum mínum.

1. Þessi ljós finnst mér geggjuð en ég man ómögulega hvar ég fann þau á netinu né hvað þau heita. Ef einhver veit þá má hinn sami endilega láta vita! 2. Regnský frá Harvest Textiles. 3. Geometry Cup 3 frá Ferm Living. 4. Mr. Cosmos. 5. Space is the Place plakat. 6. Design Letters með Arne Jacobsen letrinu. 7. Tablo Table frá Normann Chopenhagen og er eftir Nicholai Wiig Hansen. 8. Creativity plakat eftir Ylva Skarp. 9. Gat ekki sleppt því að hafa einn Boston Terrier með fyrst ég var að taka saman alla svarthvítu hlutina sem mig langar í. 10. IKEA Stockholm Rand mottan er náttúrulega æðisleg, þótt ég þyrfti stærra hús fyrir hana.

Að lífga uppá tilveruna með litum

Þetta er árstíminn þar sem við Íslendingar förum að opna hug okkar fyrir fleiri litum en svörtum og hvítum. Bæði heimili og föt margra eru oft á tíðum heldur drungaleg yfir vetrarmánuðina en sem betur fer held ég að þetta sé að breytast hægt og bítandi og við erum farin að átta okkur á hvað litir geta gert mikið fyrir okkur. Ég hef sjálf trú á því að litir geti aukið bjartsýni, ýtt undir sköpunargáfurnar og aukið gleðina í lífi okkar. Til að koma með liti inná heimili er auðveldast og minnsta skuldbindingin að bæta við púðum, blómum, kertastjökum eða þess háttar smávörum en það getur líka verið mjög skemmtilegt að lífga uppá tóma veggi með litum. Oft eru einhver illa nýtt skot eða gangar heima hjá fólki sem má lífga uppá.

Margir halda að maður fái svo fljótt leið á litum eða eiga erfitt með að velja einhvern einn til að skuldbinda sig við. Ég ákvað sjálf í einhverju kasti að mála vegginn á milli neðri og eftri skápa í eldhúsinu hjá mér heiðgulan þar sem ég týmdi ekki að kaupa á hann flísar. Nú eru orðin fimm ár síðan og ég er ennþá hæst ánægð með gula vegginn minn sem lífgar svo sannarlega uppá eldhúsið. Upprunalega hugsaði ég með mér að ég gæti þá alltaf skellt yfir hann öðrum lit ef ég fengi leið á honum og ég á mögulega eftir að gera það einn daginn…en ekki strax allavega.

Hérna eru nokkrar myndir af fallega máluðum veggjum eða hurðum í skemmtilegum litum…og smá svart hvítt með.

Krítartöfluveggir

Ég veit að þetta er svo sem ekkert nýtt af nálinni en mig hefur lengi langað til að mála vegg hjá mér með svona krítartöflumálningu. Jafnvel hefur mér dottið í hug að mála hurðarnar í íbúðinni sem mér hefur lengi langað til að láta sprautulakka en það er bara svo dýrt. Gæti verið skemmtilegt ef heimilisfólkið gæti skilið eftir skilaboð til hvors annars eða sæta mynd á hurðunum sem liggja að herbergi viðkomandi.

En vandamálið sem ég sé er endalaust ryk útum allt. Hefur einhver reynslu af þessu? Oft sér maður myndir þar sem veggir í svefnherbergjum hafa verið málaðir svona og eru svo krítaðir í drasl. Ætli þetta sé ekkert óhollt?

   

Zoo Portraits

Þið eruð mögulega búin að sjá þessar dýramyndir eftir Yago Partal á Ígló bloggsíðunni en ég stóðst ekki að pósta þeim hérna líka. Þær eru svo yndislegar og mig dauðlangar að kaupa nokkrar handa sjálfri mér, eini gallinn er bara að ég get ekki valið á milli þeirra.

Falleg íbúð í Gautaborg

Nú er alveg kominn tími til að ég fari að koma mér í gírinn fari að gera eitthvað að viti aftur, bæði hér á blogginu og í eigin hönnun. Það er búið að vera mjög erfitt að segja skilið við yndislega páskafríið mitt.

Þessar fallegu myndir fann ég á fasteignasölunni Stadshem en íbúðin er til sölu fyrir þá sem hafa áhuga. ;) Ég læt þær tala sínu máli.

-Njótið helgarinnar!

The Design Files Open House

Þessar yndislegu og sumarlegu myndir eru ekki af raunverulegu heimli heldur er hér um að ræða pop up búð sem er skipulögð af The Design Files. Lucy sem stendur að baki heldur víst reglulega svona opið hús á mismunandi heimilum þar sem hún stíliserar og allir hlutirnir sem þið sjáið eru til sölu. En ég verð að segja að ég vildi að þetta væri raunverulegt heimili. Ég get ekki ímyndað mér að það væri hægt að verða niðurdreginn í svona húsi, og sköpunargáfan hlyti að blómstra! Og talandi um að blómstra, ég hef ákveðið að fara að safna plöntum inná mitt heimili eftir að hafa skoðað þessar myndir….ég á ekki eina einustu.

Kíkið endilega á bloggið þar sem hún skrifar um Ástralskan stíl og hönnun.

 

Af ýmsum sýningum á HönnunarMars 2013

Þá er HönnunarMars lokið þetta árið þótt nokkrar sýningar standi enn opnar. Ég verð að segja að þótt ég hafi ekki verið að sýna sjálf þetta árið var ég uppgefin eftir helgina enda ekki oft sem maður þræðir opnanir og sýningar, situr fyrirlestra heilan dag og mætir á hönnunarblogghitting allt á einni langri helgi. Ég ákvað að líta á þetta sem eins konar vertíð í mínu starfi og hætta að hafa samviskubit yfir því að hafa komið drengjunum fyrir í pössun þrjú kvöld í röð til að koma þessu öllu fyrir.

Ég er búin að skrifa um nokkrar sýningar sem mér fannst hvað skemmtilegastar en þó eru nokkur verk sem ég vildi ekki skilja útundan sem ekki voru á þessum sýningum. Hérna er restin af HönnunarMars 2013 frá mér.

Ruggustóllinn Keinu eftir hönnuðinn Jenni Marttila var sýndur á sýningunni Suopunki þar sem 19 hönnuðir frá Lapplandi sýndu verk sín í Hörpu.

Hearth kertastjakarnir frá Umemi voru sýndir í Epal í Hörpu en ég hef áður fjallað um hér. Það kom mér skemmtilega á óvart að þeir eru enn fallegri í raun en á myndum. Ég hvet alla sem lýst vel á þá að kíkja á Karolina Fund og styrkja framleiðsluna.

Ljóshyrningar eftir Tinnu Gunnarsdóttur voru sýndir í Þjóðmenningarhúsinu og er borðlampi sem gefur frá sér milda óbeina lýsingu. Sérstaklega fínleg og falleg ljós sem tvinna saman iðnaðarframleiðslu og handverk. (Mynd fengin á síðu HönnunarMars.)

Hönnunarverslunin S/K/E/K/K opnaði tímabundið sýningarrými í húsnæði Listamanna innrömmunar. Allir hönnuðirnir hjá SKEKK eiga það sameiginlegt að vinna nýstárlega og framsækna hönnun út frá hefðbundnum efnum og aðferðum, án aukakostnaðar fyrir umhverfið.

Að lokum smá frá blogghittingnum.

Samsuða á HönnunarMars 2013

Concoction eða Samsuða, samsýning Félags vöru- og iðnhönnuða á Íslandi var í þetta sinn haldin í Hörpunni. 18 hönnuðir frumsýndu verk sem voru ótrúlega fjölbreytt og mörg mjög skemmtileg.

 

Hleðsluskápur eftir Sverri Ásgeirsson. Ég veit ekki um neinn sem er með sín hleðslu- og snúrumál á hreinu en ég hef séð margar misljótar hirslur fyrir allar þessar snúrur sem fylgja okkur. Þessi skápur eða vegghilla er hins vegar bæði falleg og ótrúlega sniðug lausn á hinu eilífa snúruveseni.

 

Þetta ský er fyrir ýmsa smáhluti og er hannað af Önnu Þórunni og Ingibjörgu Hönnu.

 

Kollurinn/hliðarborðið/skúffueiningin Askur frá IngaSol design er bæði falleg og skemmtileg mubla. Frábær hönnun bæði hvað varðar útlit og notagildi og eitt af uppáhalds verkum mínum á sýningunni.

 

Berg eru líka margnota húsgögn, geta verið geymslukollar eða hliðarborð og eru eftir Þórunni Árnadóttur og framleidd af Brúnás.

 

Bended sofa eftir Gulleik Lövskar á að hjálpa fólki að teygja úr sér og losa um stress í líkamanum en það er algjörlega notandans að finna út hvernig honum þykir best að koma sér fyrir. Eins og ég labbaði oft í gegnum sýninguna var þetta eina skiptið sem sófinn var auður og stóð það bara á meðan ég smellti af einni mynd og því náði ég aldrei að prófa sófann því miður.

 

Hérna eru skilaboðakerti frá Björg í Bú sem mér finnst alveg æðisleg en þau innihalda leynd skilaboð sem koma í ljós þegar kertið brennur niður. Mig minnir að þær stöllur, Edda og Helga, hafi sagt að það sé hægt að velja á milli sjö mismunandi skilaboðakerta sem er hvert öðru sniðugra en best finnst mér þetta hér sem á stendur: “I’m Gay.” Flott fyrir þá sem eiga erfitt með að tjá tilfinningar sínar eða að færa stórar fréttir.

 

Og síðast en ekki síst fannst mér Koll af kolli eftir Hönnu Jónsdóttur mjög einfalt og sniðugt verkefni sem kæmi sér örugglega vel á flest heimili, eins og á mínu þar sem heimilisfólkið er af þeirri stærð að það nær ekki allt upp í alla skápa.